السلام عليكم ورحمة الله وبركاته
يسعدني في أول موضوع لي في هذا المنتدى المناهض للمدرب الأكاديمي أن أقدم لكم هذه الهدية الصغيرة من أرشيفي الخاص بكوورة سورية أتمنى أن تعجبكم
----------------------------------
السلام عليكم ورحمة الله وبركاته
اليوم ياشباب بدي احكيلكم قصتي أنا وأبوعلي
لأن هالزلمة رح يجنني وبجوز يجبلي الجلطة بعيد الشر عن قلبي
بركي بتشوفولي حلة معو لهالزلمة
لأني حاسس إنو شغلتو مالها حلة
مالكم بطول السيرة
أبو علي يلي بدي احكيلكم قصتي معو هو ببساطة بني ادم مع التحفظ[
بسيط وحباب وكل اللي بيعرفوا عن قرب بيقولو عنو انو آدمي ومهذب وخلوق
بس عالأغلب ما بيعرفوا داخليتو وإلهن الظاهر
المهم هالشخص "أبو علي" بيشتغل بالتمديدات الصحية وعندو زبون واحد
هو أخي
ومن هون بلشت قصتي ومعاناتي مع أبو علي…
عندنا بالمحل في حنفية صرلها زمان عم تنئط ويمكن عاطلة
وأنا بصراحة مافيني غيرها لأنها وطنية وبحبها كتير مو بس أنا حتى الشباب بالحارة بيحبوها لك بيموتوا عليها مدري ليش سبحان اللهوصرت جايب كزا واحد وماحدى كان يعرف يصلحها
لا المعلمين اللي عنا بالحارة ولامن برات الحارة
لك حتى صحلي كم معلم صحية اجانب
عن جد مو مشهورين ويمكن ما بيعرفوا يصلحو بس قلت لحالي هدول ناس اجانب
ولازم تزبط معهن بس للأسف ما استفدت شي
وبيوم من الايام
وكالعادة الحنفية الوطنية عم تنئط
قلتلو لأخي :جبلك شي معلم تمديدات صحية يصلحلنا هالحنفية
أخي : تحت إيدي معلم ع كيف كيوفك زلمة جدع وأكيد رح يكشف العطل
أنا : ومين هاد بقى؟
أخي: شب ابن حارتنا اسمو أبوعلي وأكيد رح يمشي الحال معو أنا هيك حاسس..
أنا: لك مين أبوعلي بعرفوا أنا؟
أخي : لك إيه أكيد بتعرفوا كان ع طول يجي مع المعلم الأجنبي اللي ضل فترة يصلح الحنفية
أنا : لك إي عرفتو قصدك صانعو للأجنبي
أخي : لك لا لا شو صانعو ما صانعو هاد مساعدو كان وأصلا هو اللي طيروا واستلم الورشة عنو
أنا : إيوا طيب هادا شو فهمو بالحنفيات اذا معلمو اجنبي وماعرف يصلح التنئيط
أخي : لك حاج تقول صانعو هاد كان مساعدو وبعدين هاد اكيد رح يفهم بالحنفية الوطنية أكتر من الاجنبي لأنو معلم وطني وفوق هيك وهيك أبوعلي معو شهادات عالية من جزر الواق الواق بتصليح الحنفيات ومعلقها بالورشة
أنا : أيواا
ما شاء الله طيب جيبوا لنشوف
والله أخي ما كزب خبر وراح وتعاقد مع أبو علي ليصلحلنا هالحنفية
بس ياجماعة الحنفية ماكانت تزبط مع أبو علي والنقطة صارت تزيد
لك صارت تزرب بدال ما تنئط
قلتلو لأخي : الوضع ماعاد ينسكت عليه لك شوف الحنفيات الهندية صارت أحسن من حنفيتنا الوطنية شو قصتوا هالأبوعلي تبعك يعني وبعدين معك أنت وياه
أخي : ولا يهمك صبور عليه لتمضى هالفترة بس المي قوية وبالصيف ما منقدر نلاقي واحد غيرو
أنا : لك لإيمتى بدي أصبر عليه على دورو الحنفية صارت تزرب وماعاد لحقت المصارف
أخي: ولا يهمك هلأ منجيبو ومنشوف شو القصة
المهم رجع أخي ومعو أبو علي وفاتت الشباب من الحارة
لتشوف شو رح يطلع مع أبو علي وإذا الحنفية كانت رح تتصلح
وبعد ماخبص أبو علي لشبع باظت الحنفية وحسيتو خربها اكتر مالها خربانة
عصبنا أنا والشباب
وقنالو : لك شو ساويت بالحنفية
أبو علي : لك وجودكم شكل عليي ضغط وانتو السبب بخراب الحنفية
أبو علي : احكو لتشبعوا وباق هون باق
فما كان مننا الا ورحنا لعند أخي وبقينا عم نضغط عليه ونقنعو يجبلنا معلم جديد بدالو
وبعد جهد جهيد اقتنع أخي وطلب مننا نختار واحد بدالو بس ع شرط
يعين ابو علي مستشار ويقيض إجرة !!!
[ما سألنا عالموضوع كتير وقلنالو لأخي مالنا غير أبو الحجي أبو شكري
زلمة معدل وقبضاي ومحبوب بالحارة وبالحارات التانية
وصار مصلح كزا حنفية بشكل ممتاز وبمعلمية
وافق أخي على مضض ورحنا لعند الحجي
استقبلنا الحجي بشكل كريم وشهم وقبل يخدمنا هالخدمة ببلاش وبدون ولا ليرة
والله كبير انت ياحجي
وبلش الحجي يصلح بشكل احترافي وحسينا انو الحنفية بلش يخف المزراب تبعها
واستورد كم قطعة وطنية من النوع الممتاز اللي مصنعة بالبلاد الاجنبية
والمتعوب عليها
وصار يشتغل من قلب ورب
والكل حس انو حنفيتنا رح تصير متل العالم وتبطل تنئط بالمرة
بس يا سبحان الله اخي هو وابوعلي حسيناهم مو عاجبهم الوضع
وصارو يشتغلوا من تحت لتحت ليطيروا للحجي
اللي كانت رح تصلح معو الحنفية على شعرة
بس للأسف انقطعت الكهربا باخر تصليحة وما مشي الحال
ترجينا للحجي يبقى معنا
بس الحجي حس انو طول ما أخي موجود بالمحل وأبو علي مستشارو ما رح يمشي الحال
فحمل حالوا وهج من البلد كلها
وبقينا يامرحومين البي فترة طويلة بدون مصلح والحنفية شوي شوي ورجعت تنئط
وكل يوم والتاني أخي يقلي ولا يهمك اليوم رح يجي مصلح الماني
ويوم مصلح بولندي ويوم مابعرف شو حتى مليت منو
لحتى بيوم من الايام
بقلي اخي : هات البشارة
أنا : خير
أخي : لقيتلك مصلح للحنفية
أنا : لا تقلي أبوعلي
أخي : برافو عليك أبوعلي قبل يصلح حنفيتنا
على الرغم انو مافي وقت ومافي امكانيات
وعلى الرغم اني رح اعطي اجرة خفيفة خفيفة
أنا : الله لا يعطيك العافية لك شو عم تحكي
أخي : طول بالك شبك ابو علي هالمرة رح يصلحها للحنفية ان شاء الله ورح تصير عال العال ]
أنا : لك سكوت سكوت شو جنيت حدى بيعمل عملتك
أخي : إي ماحدى عم يرضى يصلحلنا الحنفية بالراتب اللي عم ندفعوا
أنا : طيب دبر حالك تدين شوف غير هالحل الله يرضى عليك
أخي : مافي حل أبو علي وبس
أنا : يازلمة الحنفية لازم تتصلح مو تتخرب وخصوصي بالبضاعة الصينية المغرقة الاسواق خايف تصدمنا الحنفية الصينية أو حتى اللبنانية
أخي : ولا يهمك انت عطي فرصتوا وان شاء الله الحنفية ماعاد تنقط
أنا: انو فرصة مو جربنا كزا سنة ومامشي حالو
أخي : ليش ابو شكري مشي حالو
أنا: لك ليش عم تقارن بين الجوز المقارنة ما بتصح ابدا
أخي : لك رووووووووووح عنا ياه
ابوعلي هالمرة رح يزبطها انت استنى عليه شوي ولا تعمل احكام مسبقة
أنا: لك انو احكام مسبقة
لك اللي بيجرب المجرب عقلو مخرب
وبعدين ماحدا عم يرضى يشغلو ليش انت دبئان فيه هالدبئة ما بعرف
لك انت مجنووووووووون
أخي : مجنون مو مجنون الزلمة معو شهادات وهو الحل الانسب والوحيد حاليا وانا
أخدت قراري ومشي الحال
انسى
لك ياجماعة يستر عليكون شو ساوي مع هالجوز
مشان الله فهموني
ع فكرة الحنفية صارت تدلف دلف وباظت عالاخروحاسسها انو رح تغرقنا
بقى لاقولي حل
ولكم جزيل الشكر
من امام الحنفية
تحياتي
الإثنين أغسطس 03, 2009 4:27 pm
